ازاي تتخلص من الكبت وتعبر عن اللي جواك؟

   كتب الموضوع  أ / محمد محي 
  استشاري نفسي ومعالج إدمان

الحقيقة إن الكبت هو أسوء شئ ممكن تأذي بيه نفسك ، كلنا خلال يومنا بنمر بمواقف كتير ممكن تتوتر شويه تتعصب شويه حد يستفزك تتضايق من حاجه!

بمرور الأيام والشهور والسنين اللي متعود يكبت من غير ما يطلع كل المشاعر دي بتتخزن جواه مش بيتخلص منها ، حتي لو حس إن خلاص الموقف عدي وإنه مبقاش متضايق وخلاص مفيش حاجة، إنما المشاعر دي نزلت تحت واتردم عليها و كدا كدا المشاعر هتطلع ، بتطلع في صورة حبوب في الوجه أو ألم في الظهر أو صداع أو قولون عصبي.

الغلطة اللي بنعملها لما نشتغل علي العضو وننسي الأصل نمسك في النتيجة وننسي السبب فبعد ما تتصلح بشويه ترجع تاني ، مفيش مشكلة إنك تشتغل علي العضو لكن بالتوازي مع شغلك الداخلي لإن في الآخر الجسم هتسيبه وتطلع بالوعي اللي وصلتله.
رحلتك بتبدأ لما تشتغل علي نفسك من جوا  و تغير أفكارك ونظرتك ووعيك وتتحمل مسؤوليتك بإنك تركز علي نفسك وبس أكن مفيش غيرك في الدنيا
والتعبير عن اللي جواك أول خطوة عشان ترجع تبقي حقيقي مع نفسك ومرتاح البال ومبسوط كل ما عبرت بوضوح كل ما ارتحت وكل ما خبيت كل ما بعدت عن نفسك وعن سعادتك ( الخباء ايجو ) هنا بيظهر الايجو اللي بيقف بينك وبين حقيقتك 
كل ما كنت صادق مع نفسك كل ما قربت اكتر ممكن تضحك علي الناس كلها وممكن يتخدعوا فعلاً لكن مش هتعرف تضحك علي نفسك وتخدعها أبداً.
 
هحكي ليكم تجربتي الشخصية انا كولد لما كنت صغير وأجي أعيط كانوا بيقولولي إني بقيت راجل والراجل مينفعش يبكي وفعلاً بقيت مببكيش خالص وبعد سنين ومع تراكم الأحداث والظروف والكبت لما احتجت أبكي عشان أرتاح لقيت الدموع مبتنزلش وأكنها بقيت صحرا استغربت في الأول وحاولت كتير لحد ما اكتشفت السبب وهي القناعة الغبية دي ، اللي كانت سبب ان رجالة كتير فقدوا حاسة الاحساس.

دلوقتي مبتكسفش أبكي وبحاول أطلع أول بأول وجربت طرق كتير لحد ما لقيت أحسن طريقة اعبر بيها عن اللي جوايا وتجيب معايا نتيجة لإن كل واحد غير التاني فجرب بنفسك وشوف اللي يجيب معاك نتيجة ، لو متضايق بسيب نفسي وكل حاجة بتاخد وقتها وبتروح مدام اتعصبت يبقي طلع العصبية متكبتهاش وبعد ما تهدي فكر انت اتعصبت ليه عشان المرة الجاية متتعصبش أصلاً فميبقاش في حاجة تطلعها من أصله الخلاصة خليك طبيعي وكل ما عشت حالاتك وتقبلتها وحررت مشاعرها هتطلع منها بسرعة وترجع لحالتك الأصلية مبسوط ومرتاح البال من غير سبب.