التفكير المفرط

التفكير المفرط وكيفية التعامل معه

  كتب الموضوع  أ / محمد محي 

  استشاري نفسي ومعالج إدمان

دماغي هتنفجر   افكار أفكار   مش قادر اتخلص منها و مش عارف أنام  ناس كتير بتعاني من التفكير الزائد لدرجة إعاقتهم عن مواصل  توافقهم اليومي الطبيعي  نتيجة شعورهم بالتعب والانهاك والشعور بالقلق وتضخيمهم للأمور.

كل ده بيخليهم عايشين حالات من الطاقة السلبية  والمعاناة من الوساوس والمخاوف غير المبررة ،  لا قادرين ينجزوا حاجه  ولا يركزوا في حاجه  ومشتتين جدا وياريت الموضوع هيقف عند كده لأ  طبعا التفكير المفرط بيؤثر في الجهاز الهضمي ويسبب التهاب الامعاء والقولون العصبي والضغط.

احد الاشخاص من ذوي الفكر المفرط بيسألني اعمل ايه؟  ممكن تقولي بعض التدريبات اعملها يمكن اعرف اقلل من افكاري شويه.

اولا :

اول ماتبدأ  دماغك تستحضر موضوع معينة هيسيطر على دماغك قول لنفسك انا لازم احدد نقطة محددة ودقيقة في الموضوع ده وافكر فيها بس واخرج منها بنتيجه وبعدها هقفل الموضوع علشان افكاري ماتتشعبش في اتجاهات تانيه مالهاش علاقة بالفكرة اللي انا حددتها  وبكده استثمرت تفكيرك في نقطه هتفيدك 

ثانيا :

عاوزك تهمس لنفسك حديث هامس بينك وبين نفسك بس وقولها  ايه اللي جرالك  يانفسي من كتر التفكير بقالك فترة طويلة غير القلق والتوتر وتشتت الانتباه والانهاك و تعب الصحة  وفي الاخر ماحققتيش اي انجاز إن هذا الحديث الصارم لنفسك من نفسك قد يردعك ويوقف سيل الانخراط في الافكار اللي مالهاش اي لازمه

ثالثا :

حاول تعمل تعديل وتغيير ايجابي في اسلوب ونوعية حياتك يعني ياريت يبقى عندك اهداف عاوز تحققها لأن انشغالك بتحقيقها بيخليك عملي اكتر منك قاعد مع دماغك  طول الوقت بمعني مش هيخليك تحرق بنزين على الفاضي ومن غير سواقه

رابعا :

أول ماتشعر أنك وقعت فريسه للافكار التهويلية المزعجة ، قوم وغير نشاطك  اخرج وغير المكان واتفسح او العب اي لعبه او احضر اي مناسبه او تواصل هاتفيا مع اصحابك المهم ماتقعدش مع دماغك

خامسا :

لازم تعرف وتدرب  نفسك انك تحط كل حاجه في حجمها الطبيعي ولازم تعرف ان التفكير المفرط اللي بيحصلك ده  نتيجة عدم قدرتك على الحكم الصحيح على الافراد و ادارة الموضوعات وأنك بتدي ناس تفكير اكبر من حجمهم  وبتعطي موضوعات اهتمام اكتر من حجمها ياريت بقى تبقى عاقل كده وتحط كل حاجه في مكانها وحجمها

سادسا :

جانب كبير من التفكير المفرط اللي عندك  انك عاوز كل حاجه تعملها  ذي الكتاب مابيقول  من الاخر كده عاوز شغلك وعلاقاتك وموضوعاتك كلها دقيقة زي المسطرة ، وانا بقولك ده صعب جدا لأن الكمال لله وحده

سابعا :

كثير من الافكار التي تغزو ذهنك عادة ماتكون سوداويه وترتبط  من حيث حدوثها بالمستقبل لذلك ياريت تؤمن ان الغيب بيد الله وكلنا لا نعلم مصائرنا القادمة لمدة دقيقة  إن هذا الاتجاه القدري التوكل على الله سيقلل كثيرا من ضغط الافكار السوداوية

مع خالص امنياتي 

لكل من يعانون من التفكير المفرط براحة البال